“ ቀጠለ…ወደ እሳቱ” – ጌታቸው አበራ

እንደ እሳት እራቷ – እንደ ቢራቢሮ፣
ብር… ትር… እያለ – ክንፎቹን ሰትሮ፣
ሙቀቱን ሳይለካ – ትርፍና ኪሳራ፣
ብርሃኑ መስሎት – መንገድ እሚመራ፣
እሚቋቋም መስሎት – በሰላ አንደበቱ፣
የመቅለጡን ጉዞ – ቀጠለ ወደ እሳቱ!

፩. ቁጭ ብሎ አሸልቦት- ላይ-ታቹን ሳያማትር፣
ከጊቢው የተነሳው – ከወንበሩ እግር ስር፣
ባውሎ-ነፋስ ፍጥነት-አገር ያዳረሰው፣
ሰደድ-እሳት ደርሶ-ድንገት ያስወገደው፡

፪.ቁርጥ ቀን ሲመጣ – ድንገት ተፈናጥሮ፣
ያመለጠ መስሎት – ባየር ተወርውሮ፣
ከህሊናው ርቆ ሊያመልጥ ሳይሳነው፣
በጸጸት ልዩ እሳት…፣
ባገር ናፍቆት ነዲድ ሲቆላ እሚኖረው፤

፫.ሕዝባዊ ማዕበል – ወላፈን ለብልቦት፣
የእሳቱን ጣጣ – መሸከም ተስኖት፣
ሸሩን የቀመረው – ተንኮሉን ያደራው፣
አንጎሉ ፈንድቶ – የተሰናበተው፤

፬.ሙቀት ሲያይልበት – እሳቱ ሳይበላው፣
“በየሱስ ስም!” ብሎ- ሮጦ ያመለጠው፤

… ቢያንስ በእኛ ዕድሜ – ያየናቸው “አራቱ”፣
ዞረው፣… ዞረው፣…ዞረው፣… ሲገቡ ከእሳቱ፣
እንዴት እንዳልሰማ፣ እንዴት እንዳላየ ‘እንደተበለቱ’፣
እኔስ ግራ-ገባኝ፣ እንጃኝ! “እንጃ-አባቱ”!

ተው ቢሉት እሚያውቁ – እሳቱ የታያቸው፣
እምቢኝ ብሎ ሄደ – ጎሪጥ እያያቸው፣
የእርሱስ መጨረሻ – ክዋኔው ናፈቀኝ፣
እንዳህያው ሥጋ..
አልጋ ሲሉት መደብ- መረጠ መሰለኝ፤
“ያላወቁ አለቁ”- ነበረ ተረቱ፣
እያወቁ ማለቅ- ጉዞ ወደ እሳቱ!

ጌታቸው አበራ
ሰኔ 2014 ዓ/ም
(ጁን 2022)