በምስራቅ ጎጃም ደብረ ወርቅ 2ኛ ደረጃ ት/ቤት መምህራን የስራ ማቆም አድማ አደረጉ

ምንጮቹ ዛሬ ጥር 30/2008 ዓ.ም እንደገለጹት በትምህርት ቤቱ የሰሚስተሩን አጋማሽ ረፍት ጨርሰው ተማሪዎች ወደትምህርት ቤቱ ቢመጡት መምህራኑ በስራ ገበታቸው ላይ ባለመገኘታቸው ተማሪዎቹ ‹‹የትምህርት ጥራት ይጠበቅ!›› በማለት መፈክር እያሰሙ ወደቤታቸው ተመልሰዋል፡፡

የደብረ ወርቅ 2ኛ ደረጃ ት/ቤት ካለፈው ዓመት የካቲት ጀምሮ በተለያዩ ችግሮች ውስጥ ከርሟል ያሉት ምንጮቹ በዋናነት ከመመሪያ ውጭ በርዕሰ መምህርነት የሚሾሙት አካላትና የወረዳው የት/ት ጽ/ቤት ኃላፊ የሆኑት አቶ ፍቅረአዲስ ሙሉሰው ለችግሩ መባባስ አስተዋጽኦ አላቸው ተብሏል፡፡

‹‹በክልሉ የሌለ አሰራር በመከተል በት/ቤቱ 4 ምክትል ርዕሰ መምህራን ተሹመውብን ቆይተዋል፤ ይህ መመሪያ ይጥሳል ብለን ታግለን አስወረድናቸው፡፡ ነገር ግን ከወረዱት መካከል አንዱን ርዕሰ መምህር አድርገው እንደገና ሾሙት፡፡ በዚህም ችግሩ ተባብሶ ቀጠለ፤ እኛም ድርጊቱ ትምህርትን ይጎዳል ብለን ከዛሬ ጀምሮ አድማ ልናደርግ ችለናል›› ብሏል አድማ ከመቱ መምህራን አንዱ፡፡

በት/ቤቱ 141 መምህራን እንዳሉ የጠቆሙት ምንጮቹ፣ ከእነዚህ መካከል ከ100 በላይ የሚሆኑት የአድመውን ተካፋይ ናቸው ተብሏል፡፡ የትምህርት ቤቱ አስተዳደርና የወረዳው ትምህርት ጽ/ቤት መምህራኑን ‹‹ሰማያዊ ፓርቲን እንጂ ኢህአዴግን አትቀበሉም›› እያለ ችግሩን ለመግፋት እየሞከረ እንደሆነም ምንጮቹ አክለው ግልጸዋል፡፡